کراچی کے علاقے ملیر سکھن گوٹھ میں ڈاکو فیکٹری ملازمین سے کروڑوں کی رقم لوٹ کر فرار ہو گئے۔
پولیس کے مطابق درج کروائی گئی ایف آئی آر میں مدعی کا کہنا ہے کہ ملازمین بینک سے رقم نکلوا کر گاڑی میں فیکٹری لے جا رہے تھے کہ اسی دوران ڈاکو آدھمکے۔
اور ایک کروڑ 82 لاکھ روپے لوٹ کر فرار ہوگئے۔اس کے علاوہ کورنگی گودام چورنگی پر بھی ڈاکوؤں نے فیکٹری ملازم سے پچاس لاکھ روپے چھین لئے اور دیدہ دلیری کا مظاہر ہ کرتے ہوئے دھڑلے سے فرار ہوگئے۔
اس وقت شہر نگاراں کراچی مکمل طور پر ڈاکوؤں اور اسٹریٹ کرمنلز کے ہاتھوں یرغمال بنا ہوا ہے۔
ایک اور خبر کے مطابق کراچی کے علاقے بفرزون میں بھی ایک ڈاکو شہریوں کے ہتھے چڑھ گیا اور شہریوں نے اس کی درگت بنا ڈالی۔
شدید تشدد سے وہ زخمی ہوگیا۔بعد ازاں اسے پولیس کے حوالے کردیا گیا۔
