لاہور: متحدہ نانبائی ایسوسی ایشن نے روٹی کی قیمت کم کرنے سے انکار کر دیا۔
نانبائی ایسوسی ایشن نے سرکاری احکامات مسترد کرتے ہوئے کہا ہے کہ پنجاب حکومت جو چاہے کر لے 16 روپے کی روٹی نہیں بیچیں گے۔
ایسوسی ایشن نے ایک اعلامیہ جاری کرتے ہوئے کہا کہ آٹے کا تھیلا 1600 روپے اور فائن میدہ 7500 روپے کرنے تک روٹی سستی نہیں کریں گے، 5 روز مزید انتظار کرنے کے بعد غیر معینہ مدت تک ہڑتال پر جائیں گے۔
اعلامیے میں بتایا گیا کہ لاہور شہر کے بیش تر تندوروں پر پرانی قیمت بحال کر دی گئی ہے۔
دوسری طرف شرقپور شریف میں حکومت کی جانب سے روٹی 16 اور نان 20 روپے کیے جانے کے خلاف نان روٹی ایسوسی ایشن نے احتجاج کیا ہے، ایسوسی ایشن نے کہا کہ آج حکومت کے خلاف ایک احتجاجی ریلی نکالی جائے گی۔
