پشاور: کرغزستان سے پشاور کیلئے پہلی خصوصی پرواز باچاخان ایئرپورٹ پہنچ گئی، کرغزستان میں پھنسے 290 پاکستانی طلبہ کو خصوصی طیارے سے وطن واپس لایا گیا۔
رپورٹ کے مطابق خصوصی طیارے کے ذریعے290 طلبہ باچاخان ایئرپورٹ پہنچ گئے، طلبہ کے والدین اور رشتہ دار بھی پشاور ایئرپورٹ پر بڑی تعداد میں موجود تھے۔باچاخان ایئرپورٹ پرخیبرپختونخوا کے وزرا نے طلبہ کااستقبال کیا، اس موقع پر امیناخان،ظاہرشاہ طورو،قاسم علی شاہ،فخر جہاں ودیگر موجود تھے۔
اس سے قبل ایک بیان میں وزیر اعلیٰ خیبر پختونخوا علی امین گنڈاپور نے الزام عائد کیا تھا کہ وفاق کرغزستان سے طلبہ کی واپسی میں روڑے اٹکا رہا ہے۔
علی امین گنڈاپور نے اپنے ایک بیان میں کہا کہ رقم کی ادائیگی کر دی گئی لیکن اس کے باوجود سی اے اے پھر بھی تعاون نہیں کر رہی، ایئربس کل سے تیار کھڑی ہے اور دستاویز بھی مکمل ہیں۔انہوں نے کہا کہ پاکستانی طلبہ کے مستقبل کا سوال ہے لہٰذا وفاق معاملے میں سیاسی پوائنٹ اسکورنگ نہ کرے، وفاق کو کہہ رہا ہوں شرم کریں پاکستانیوں کے والدین یہاں پریشان ہیں۔
