پاکستان کرکٹ ٹیم نے رواں سال آسٹریلیا کا دورہ کرنا ہے اس دورے کے لیے کرکٹ آسٹریلیا نے پاکستانی شائقین کے لیے فین زون بنانے کا بھی اعلان کیا تھا اور اب کرکٹ آسٹریلیا کی جانب سے پاکستان فینز زون کی ٹکٹوں کا اعلان بھی کردیا گیا ہے۔
کرکٹ آسٹریلیا کے مطابق تمام وینیوز کے لیے فینز زونز کی ٹکٹیں 30 سے 45 آسٹریلین ڈالر تک مقرر کی گئی ہیں۔
میلبرن میں کھیلے جانے والے ون ڈے کے لیے پاکستان فینز زون کی ٹکٹ 30 ڈالر مقرر کی گئی ہے جبکہ ایڈیلیڈ اور پرتھ ون ڈے میچز کی ٹکٹیں 45 ڈالر ہیں جو پری سیل میں 39 ڈالر میں بک کی جاسکتی ہیں۔
ان مقامات کے علاوہ برسبین اور سڈنی میں پاکستان فینز زونز کی ٹکٹ 30 ڈالر کی مقرر کی گئی ہے جبکہ ہوبارٹ میں پاکستان فینز زون کی ٹکٹ 45 ڈالر مقرر ہے جو پری سیل میں 39 ڈالر کی بک کی جاسکتی ہیں۔
واضح رہے کہ ٹکٹوں کی پری سیل 4 جون سے شروع ہوگی جس کے لیے 3 جون تک رجسٹر کرنا لازمی ہے اور بغیر رجسٹریشن کے ٹکٹوں کی جنرل سیل 14 جون سے شروع ہوگی۔علم میں رہے کہ پاکستان کرکٹ ٹیم نے نومبر میں آسٹریلیا کا دورہ کرنا ہے جس میں تین ون ڈے اور تین ٹی ٹوئنٹی میچز شامل ہیں۔
