خیبر پختونخوا اور بلوچستان اسمبلیوں کا اجلاس آج ہو گا، دونوں اسمبلیوں کے اجلاس کے لیے ایجنڈا جاری کر دیا گیا۔
خیبر پختونخوا اسمبلی کے اجلاس کا آغاز آج صبح 11 بجے ہو گا، تلاوت کلام پاک کے بعد نومنتخب اراکین اسمبلی حلف اٹھائیں گے اور حاضری رجسٹرڈ پر دستخط کریں گے۔
خیبرپختونخوا میں ن لیگ نے ڈاکٹر عباداللہ کو وزارت اعلیٰ کا امیدوار نامزد کردیا۔حلف برداری کے بعد اسپیکر اور ڈپٹی اسپیکر کے انتخاب کے لیے کاغذات نامزدگی 5 بجے تک سیکرٹری اسمبلی کے پاس جمع کرائے جائیں گے۔
دوسری جانب بلوچستان اسمبلی کا اجلاس بھی آج ہو گا جس میں 50 سے زائد نومنتخب اراکین اسمبلی حلف اٹھائیں گے۔اجلاس کی صدارت اسپیکر کی عدم موجودگی پر سینئر رکن انجینئر زمرک خان اچکزئی کریں گے جبکہ 29 فروری کو اسپیکر اور ڈپٹی اسپیکر کا انتخاب ہوگا۔بلوچستان میں جے یو آئی نے وزارت اعلیٰ کے لیے اپنا امیدوار لانے کا فیصلہ کیا ہے۔
ادھر پیپلز پارٹی اورمسلم لیگ (ن) کے درمیان مفاہمت اور شراکت اقتدار کا فارمولا طے پاچکا ہے، جس کے تحت وزیراعلی پیپلز پارٹی کا ہوگا،اسپیکر نون لیگ سے لیا جائے گا۔
واضح رہے کہ سینیٹر سرفراز بگٹی نے سینیٹ کی سیٹ چھوڑ دی جبکہ بلوچستان عوامی پارٹی (بی اے پی) کے سینیٹر پرنس عمر احمد زئی نے بھی سینیٹ کی نشست سے استعفیٰ دے دیا۔دونوں ارکان بلوچستان اسمبلی میں آج بطور ایم پی اے حلف لیں گے جبکہ اختر مینگل نے صوبائی اسمبلی کی نشست چھوڑنے کا فیصلہ کیا ہے۔
