پاکستان فلم وڈرامہ انڈسٹری کی مشہور ومعروف اداکارہ مہوش حیات نے سوشل میڈیا سائٹ انسٹاگرام پر اپنی نئی تصویر پوسٹ کی ہے۔ جس میں اُن کے ہمراہ بھارتی میوزک ریپر ہنی سنگھ اور راؤ علی خان موجود ہیں۔
ساتھ ہی مہوش حیات نے معروف بھارتی میوزک ریپر یو یو ہنی سنگھ کے ساتھ کام کرنے کا اعلان بھی کردیاہے۔
مہوش حیات نے ہنی سنگھ کے ساتھ شیئر کی گئی اپنی مشترکہ پوسٹ میں کہا کہ میں نے اپنے دیسی کلاکار کے ساتھ نئے ٹریک‘کِلر’کے لیے تعاون کیا ہے۔
تاہم ان کی جانب سے پوسٹ میں گانے کی ریلیز کی حتمی تاریخ کا اعلان نہیں کیا گیا۔بس بہت جلدریلیز ہونے کاعندیہ دیا گیا ہے۔
یاد رہے کہ رواں سال کی شروعات میں بھی مہوش حیات نے بھارتی میوزک ریپر سے ملاقات کی تھی۔ جس کی تصویر ہنی سنگھ نے اپنے انسٹاگرام ہینڈل پر پوسٹ کی تھی۔
اس موقع پر ہنی سنگھ کا کہنا تھا کہ مہوش حیات زندہ دل خاتون ہیں، مجھے ان سے ملاقات کرکے بہت خوش ہوئی۔
آپ کی یاددہانی کے لئے بتاتے چلیں کہ مہوش حیات کا شمار پاکستان کی صف اول کی اداکاراؤں میں ہوتا ہے۔وہ ایک معروف شو بزنس فیملی سے تعلق رکھتی ہیں۔اور بہت کم عمری سے اداکاری کے میدان میں سرگرمِ عمل ہیں۔انھیں لالی ووڈ باکس آفس پر وقت کی بڑی اداکارہ کے طور پرجانا جاتاہے جنہوں نے لگاتار پانچ ہٹ فلمیں دیں۔
اپنی پہلی فلم میں ڈانسر کا کردار ادا کرنے سے لے کر اپنی آخری فلم میں ایک سادہ پنجابی لڑکی تک،انھوں نے ہر رول میں کردار کو نبھانے میں یدِ طولی کا مظاہرہ کیا اور چیلنجنگ کردار ادا کرنے میں اپنی مثال آپ رہیں۔
دوہزار انیس میں صدر پاکستان نے انھیں قومی سول ایوارڈ، تمغہ ء امتیاز (تمغہ حسن کارکردگی) سے نوازا۔رواں برس یو یو ہنی سنگھ اور مہوش حیات کے موجودہ اعلان کے بعد پاکستان سمیت بھارتی مداحوں کی جانب سے اُن کے نئے گانے پر بے پناہ مسرت کا اظہار کیا جارہا ہے۔
