نیوزی لینڈ کرکٹ ٹیم کے دورہ پاکستان کے سلسلے میں تربیتی و فٹنس کیمپ کے لئے کھلاڑیوں کے انتخاب پر چیئرمین پاکستان کرکٹ بورڈ محسن نقوی کی پی سی بی حکام سے تفصیلی بات چیت ہوئی۔
اوراس تفصیلی گفت وشنید میں پاکستان کرکٹ بورڈ کے ہیڈ آفس میں کیمپ کے لئے کھلاڑیوں کے ناموں پر غور کیا گیا۔
جس میں محسن نقوی نے میرٹ اور کارکردگی پر کھلاڑیوں کے انتخاب کی خصوصی ہدایات دیں۔
دریں اثناء چیف سلیکٹر وہاب ریاض نے چیئرمین کو پی ایس ایل نائن میں اچھی کارکردگی دکھانے والے بلے بازوں اور بولرز کے بارے میں رپورٹ بھی پیش کی۔
چیئر مین پی سی بی محسن نقوی نے مزید ہدایات جاری کرتے ہوئے کہا کہ پی ایس ایل نائن میں بہترین کارکردگی کا مظاہرہ کرنے والے کھلاڑیوں کو کیمپ میں شامل کیا جائے، کیمپ کے لیے کھلاڑیوں کے انتخاب میں میری سفارش بھی قبول نہ کی جائے۔
انہوں نے کہا کہ میرٹ اور کارکردگی پر منتخب کھلاڑی ہی اچھے نتائج دینے کی صلاحیت رکھتے ہیں۔
