ویسٹ انڈیز کی خواتین کرکٹ ٹیم کے پانچ ٹی ٹوئنٹی اور تین ون ڈے میچز کی سیریز کیلئے دورہ پاکستان کے شیڈول کا اعلان کردیا گیا ہے۔
ویسٹ انڈین ویمن کرکٹ ٹیم تین ون ڈے انٹرنیشنل اور پانچ ٹی ٹوئنٹی میچز کھیلنے کیلئے چودہ اپریل کو کراچی پہنچے گی۔
آئی سی سی ویمن چیمپئن شپ دوہزار بائیس تا دو ہزار پچیس کیلئے تین ون ڈے میچزاٹھارہ، اکیس اور تیئس اپریل۔ چھیس، اٹھائیس اور تیس اپریل، دو اورتین مئی کو پانچ ٹی ٹوئنٹی میچز کھیلے جائیں گے۔
پاکستان ویمن ٹیم اس وقت آئی سی سی ویمن چیمپئن شپ کی رینکنگ میں اٹھارہ میچز میں سولہ پوائنٹس حاصل کرکے تیسرے نمبر پر موجود ہے۔ جبکہ ویسٹ انڈیز کی ٹیم بارہ میچوں میں آٹھ پوائنٹس کے ساتھ نویں نمبر پر ہے۔
اسی ضمن میں آپ کو بتاتے چلیں کہ ویسٹ انڈیز ویمن ٹیم کے دورہ پاکستان سے متعلق بات چیت کرتے ہوئے خواتین کرکٹ کی سربراہ تانیہ ملک کا کہنا تھا کہ ہم ویسٹ انڈیز کی خواتین ٹیم کا پاکستان میں پرتپاک استقبال کرنے کے لئے تیار ہیں۔
ان کا مزید کہنا تھاکہ ہوم گراؤنڈ پر چوتھی سیریز کی میزبانی خواتین کی کرکٹ کو فروغ دینے اور ہماری کھلاڑیوں کو بین الاقوامی سطح پر نمایاں ہونے کے مواقع فراہم کرنے کیلئے پی سی بی کے عزم کا ثبوت ہے۔
تانیہ ملک کے مطابق پاکستان کی خواتین ٹیم کیلئے آئی سی سی ویمن ون ڈے ورلڈ کپ کیلئے براہ راست کوالیفائی کرنے کے امکانات پہلے سے کہیں زیادہ ہیں۔
خیال رہے کہ رواں سال کے آخر میں آئی سی سی خواتین کاٹی ٹوئنٹی ورلڈ کپ بھی منعقد ہو رہا ہے، اس ایونٹ اور مختصر ترین فارمیٹ میں ٹیم کی حالیہ بہترین کارکردگی کی روشنی میں ویسٹ انڈیز کے خلاف پانچ ٹی ٹوئنٹی میچوں کی سیریز سے سلیکٹرز کو میگا ایونٹ کیلئے اسکواڈ کو حتمی شکل دینے میں مدد ملے گی۔
واضح رہے کہ پاکستان اور ویسٹ انڈیز کی ویمن ٹیموں کے درمیان تمام ون ڈے اورٹی ٹوئنٹی میچز اٹھارہ اپریل سے تین مئی تک نیشنل اسٹیڈیم کراچی میں کھیلے جائیں گے۔
