پاکستان میں جیسے جیسے گرمی کا موسم اپنی شدت پکڑ رہا ہے اور سورج کی تپش میں اضافہ ہوتا جارہا ہے وہیں پھلوں کا بادشاہ آم بھی پک کر تیار ہوچکا ہے۔
دنیا بھر میں مشہور پاکستان کے مختلف اقسام کے آم چونسا، سندھڑی، لنگڑا، دوسیری اور انور راٹھور اپنا منفرد ذائقہ رکھتے ہیں۔
ملک بھر میں آم کی متعدد اقسام ہونے کے بعد اب وہ آم بھی دستیاب ہے جس کی قیمت چند سو روپے نہیں بلکہ لاکھوں روپے ہے۔ دنیا کے اس مہنگے ترین آم ‘میازاکی’ کی کاشت اب کراچی میں بھی شروع کر دی گئی ہے جو اس سے پہلے صرف جاپان میں کاشت ہوتا تھا۔
کراچی میں اس قیمتی آم ’میازاکی‘کی کاشت کرنے والے کسان نے میڈیا سے گفتگو کرتے ہوئے بتایا کہ ویسے تو اس کا رنگ پیلا ہوتا ہے لیکن یہ آم ذائقے کے علاوہ رنگت میں بھی مختلف ہے۔ یہ اپنی منفرد رنگت، ذائقے اور قیمت کی وجہ سے بھی مشہور ہے۔
کسان کے مطابق عالمی منڈی میں ’میازاکی‘ کی فی کلو قیمت 8 سو سے 9 سو امریکی ڈالر ہے جو پاکستان روپے میں ڈھائی لاکھ سے 3 لاکھ روپے تک بنتی ہے۔ ’میازاکی‘ کی کاشت آزمائشی بنیادوں پر شروع کی گئی جس میں ہمیں کامیابی ملی ہے۔
