مشرق وسطیٰ کی سیاست میں اہم پیش رفت سامنے آئی ہے، سعودی عرب نے ایک دھائی سے زیادہ عرصے بعد فیصل المجفل کو شام میں نیا سفیر مقرر کردیا ہے۔
سرکاری خبر رساں ایجنسی ایس پی اے کی رپورٹ کے مطابق فیصل المجفل نے شام میں سفیر کی حیثیت سے تقرر پر اعلیٰ قیادت کا شکریہ ادا کیا۔شام میں ہونے والی خانہ جنگی کے دوران 2012 میں سعودی سفارتخانے کو بند کردیا گیا تھا، اس کے بعد اب فیصل المجفل دمشق میں مملکت کے پہلے سفیر ہوں گے۔
واضح رہے کہ شام نے گزشتہ سال سعودی عرب میں اپنا سفارتخانہ دوبارہ کھولا تھا اور 6 دسمبر میں سعودی عرب کے لیے ڈاکٹر محمد ایمن سوسان کو سفیر مقرر کیا تھا۔
دوسری جانب سعودی عرب کی جانب سے رفح میں اسرائیلی فوجی آپریشن روکنے کے عالمی عدالت انصاف (آئی سی جے) کے فیصلے کا خیر مقدم کیا گیا ہے۔
سعودی وزارت خارجہ کا اس حوالے سے کہنا ہے کہ عالمی عدالت انصاف کا فیصلہ فلسطینیوں کے اخلاقی اور قانونی حق کی جانب مثبت قدم ہے۔سعودی وزارت خارجہ کے جاری بیان میں کہا گیا ہے کہ اس قسم کے عالمی فیصلوں میں تمام فلسطینی علاقوں کو شامل کیا جانا چاہیے۔
