طویل عرصے سے اڈیالہ جیل میں قید سابق وزیراعظم عمران خان کی تصویر سامنے آنے پر شوبز ستارے بھی خوشی سے نہال ہوگئے۔
توشہ خانہ، القادر ٹرسٹ اور دورانِ عدت نکاح کیس سمیت متعدد کیسز میں اڈیالہ جیل میں قید عمران خان آج سپریم کورٹ میں ویڈیو لنک کے ذریعے پیش ہوئے جس سے اُن کی ایک تصویر تیزی سے سوشل میڈیا پر وائرل ہوگئی۔
تصویر وائرل ہوتے ہی ناصرف پی ٹی آئی اراکین بلکہ اداکارہ مشی خان اور اداکار ہارون شاہد بھی خوشی سے پھولے نہ سمائے اور سوشل میڈیا پر اپنے اپنے انداز سے پیغام جاری کردیے۔
کپتان کی وائرل ہونے والی تصویر کو مشی خان نے اپنے آفیشل انسٹاگرام اکاونٹ پر شیئر کیا اور ساتھ ہی کیپشن میں لکھا کہ ‘آج سپریم کورٹ کی سماعت میں کپتان کی تازہ ترین تصویر منظر عام پر آئی۔
انہوں نے کہا کہ واہ! آپ بہت اچھے لگ رہے ہیں خان صاحب۔ یہ کوئی تعجب کی بات نہیں کہ ان لوگوں نے سماعت کی لائیو اسٹریمنگ روک دی کیونکہ یہ ہمارے کپتان سے خوفزدہ ہیں، خوش رہیں کپتان۔‘
مداحوں اور کپتان کے چاہنے والوں نے اداکارہ کی پوسٹ کے نیچے کمنٹس میں لکھا کہ ‘وی مِس یو کپتان‘۔
تصویر وائرل ہونے کے کچھ ہی دیر بعداداکار ہارون شاہد نے ‘لائٹ بلو‘ کلر کی ٹی شرٹ میں تصویر انسٹاگرام اسٹوری پر لگائی اور اُس پر لکھا کہ ‘مرشد نے بلو پہنا تو ہم نے بھی پہنا۔‘
کپتان کو لائیو اسٹریمنگ پر دیکھنے کیلئے جہاں انکے سپورٹرز بے صبری سے انتظار کررہے تھے ،انہیں یہ خبر سُن کر افسوس تو ہوا کہ اسٹریمنگ نہیں دکھائی جائے گی لیکن اپنے لیڈر کی ایک ہی جھلک دیکھ کر اِن سب کو اطمینان بھی ہوگیا کہ خان صاحب خیر خیریت سے ہیں۔
